മെയ് 10; സഈദ് സാഹിബ് ജന്മദിനം

ഇന്ന് മെയ് 10. മർഹൂം പി.എം.സഈദ് സാഹിബിന്റെ ജന്മദിനം. ലക്ഷദ്വീപിന്റെ അഭിമാനമായി ദേശീയ രാഷ്ട്രീയത്തിന്റെ നേതൃനിരയിൽ തിളങ്ങിയ അദ്ദേഹം 1941 മേയ് 10-ന് ആന്ത്രോത്ത് ദ്വീപിലെ പടന്നാത തറവാട്ടിൽ ജനിച്ചു. പടന്നാത മുഹമ്മദ് സഈദ് എന്ന പി.എം സഈദ് ദ്വീപുകാരുടെ സ്വന്തം സഈദ് സാഹിബായി ഇന്നും അവരുടെ മനതലങ്ങളിൽ ജ്വലിച്ച് നിൽക്കുന്നു.

രാഷ്ട്രീയ ജീവിതം ആരംഭിക്കുന്നത് 1967-ൽ ലക്ഷദ്വീപ് പാർലമെന്റ് മണ്ഡലം രൂപീകരിക്കുന്നതോടെയാണ്. കന്നിയങ്കത്തിൽ തന്നെ ഇന്ത്യൻ ജനാധിപത്യത്തിന്റെ ശ്രീകോവിലാവുന്ന പാർലമെന്റിലേക്ക് തന്റെ 26-ആം വയസ്സിൽ അദ്ദേഹം തിരഞ്ഞെടുക്കപ്പെട്ടു. നാലാം ലോകസഭയിലെ ഏറ്റവും പ്രായം കുറഞ്ഞ അംഗമായി തിരഞ്ഞെടുക്കപ്പെട്ട അദ്ദേഹം, അവിടുന്നങ്ങോട്ട് പത്ത് തവണ തുർച്ചയായി ലോകസഭാംഗമായി. 1979-80 ലെ ചരൺസിംഗ് സർക്കാരിൽ അദ്ദേഹം ആദ്യമായി കേന്ദ്രമന്ത്രിയായി തിരഞ്ഞെടുക്കപ്പെട്ടു. അന്ന് കൽക്കരി, സ്റ്റീൽ മൈനിംഗ് വകുപ്പുകളുടെ ചുമതല വഹിച്ചു. പിന്നീട് 1993-95 നരസിംഹ റാവു മന്ത്രിസഭയിൽ കേന്ദ്ര ആഭ്യന്തര സഹമന്ത്രിയായും 1995-96 കാലഘട്ടത്തിൽ കേന്ദ്ര വിവര പ്രക്ഷേപണ വകുപ്പ് മന്ത്രിയായും അദ്ദേഹം സേവനമനുഷ്ഠിച്ചു. 1998 മുതൽ 2004 വരെ എ.ബി.വാജ്പേയി പ്രധാന മന്ത്രിയായിരിക്കെ പി.എം സഈദ് ലോക്സഭാ ഡെപ്യൂട്ടി സ്പീക്കറായിരുന്നു.

1967 മുതൽ 2004 വരെ ലോകസഭയിൽ ലക്ഷദ്വീപിനെ പ്രതിനിധീകരിച്ച അദ്ദേഹം 2004-ലെ തിരഞ്ഞെടുപ്പിലാണ് ആദ്യമായി പരാജയപ്പെടുന്നത്. അന്ന് ജനതാദൾ (യു) നേതാവ് ഡോ.പി.പി.കോയയോട് വെറും 71 വോട്ടിനാണ് അദ്ദേഹം പരാജയപ്പെട്ടത്. തിരഞ്ഞെടുപ്പിൽ പരാജയപ്പെട്ടെങ്കിലും രാജ്യ തലസ്ഥാനമായ ഡൽഹിയെ പ്രതിനിധീകരിച്ച് അദ്ദേഹം രാജ്യസഭയിലേക്ക് തിരഞ്ഞെടുക്കപ്പെട്ടു. തുടർന്ന് 2005 ഡിസംബർ 18-ന് കൊറിയയിലെ സിയോളിൽ വെച്ച് മരണപ്പെടുന്നത് വരെ അദ്ദേഹം കാബിനറ്റ് പദവിയോടെ കേന്ദ്ര ഊർജ്ജ വകുപ്പ് മന്ത്രിയായിരുന്നു.