തീരസംരക്ഷണ അഭ്യാസ പ്രകടനം ‘സീ വിജിൽ’ സമാപിച്ചു

കൊച്ചി: ഇന്ത്യൻ നേവി സംഘടിപ്പിച്ച രണ്ട് ദിവസത്തെ തീരസംരക്ഷണ അഭ്യാസപ്രകടനം ‘സീ വിജിൽ’ സമാപിച്ചു. കോസ്​റ്റ്​ ഗാർഡ്, സംസ്ഥാന സർക്കാർ, കേന്ദ്രഭരണ പ്രദേശങ്ങൾ എന്നിവയുടെ സഹകരണത്തോടെയായിരുന്നു പരിപാടി. കടലിൽനിന്ന് ഉണ്ടാകുന്ന ഭീഷണികൾക്കെതിരെ രാജ്യത്തിൻെറ തീരദേശ പ്രതിരോധ സംവിധാനത്തെ പരിശോധിക്കുകയും ശക്തിപ്പെടുത്തുകയുമാണ് ലക്ഷ്യം. സമീപകാലത്ത് രാജ്യം നടത്തിയതിൽ പ്രധാനപ്പെട്ട സുരക്ഷ പ്രകടനമായിരുന്നു ഇത്. തീരദേശ പ്രതിരോധ കമാൻഡർ ഇൻ ചീഫി​ൻെറ നേതൃത്വത്തിലായിരുന്നു പ്രകടനം. ഇന്ത്യൻ നാവികസേനയുടെയും തീരസംരക്ഷണ സേനയുടെയും നൂറിലധികം കപ്പലുകൾ, പട്രോളിങ് ക്രാഫ്റ്റുകൾ, വിവിധ സുരക്ഷയുള്ള പട്രോളിങ് ബോട്ടുകൾ എന്നിവ പങ്കെടുത്തു. കേരളം, ലക്ഷ‍ദ്വീപ്, മാഹി തീരങ്ങളിലായിരുന്നു അഭ്യാസം. വൈസ് അഡ്മിറൽ അനിൽകുമാർ ചൗളയാണ് പ്രവർത്തനങ്ങൾ നിരീക്ഷിച്ചത്. കൂടാതെ കോസ്​റ്റ്​ ഗാർഡ്, കോസ്​റ്റൽ പൊലീസ്, കസ്​റ്റംസ്, ഐ.ബി, ഫിഷറീസ് ഉന്നത ഉദ്യോഗസ്ഥരുമുണ്ടായിരുന്നു. ekg sea vigil നാവികസേന സംഘടിപ്പിച്ച തീരസംരക്ഷണ അഭ്യാസ പ്രകടനം സീ വിജിലിൽ നിന്ന്