ലക്ഷദ്വീപിൽ റിപ്പോർട്ട് ചെയ്ത നാല് കടൽവെള്ളരി വേട്ട കേസുകൾ സിബിഐ അന്വേഷിക്കും. വീഡിയോ കാണാം

0
1505

ഈ വർഷം ജനുവരി-ഫെബ്രുവരി മാസങ്ങളിലാണ് ഏറ്റവും വലിയ വേട്ട നടന്നത്. ലോകത്തിലെ ഏറ്റവും വലിയ കടൽവെള്ളരി വേട്ടയ്ക്കായിരുന്നു ഫെബ്രുവരിയിൽ ലോകം സാക്ഷ്യംവഹിച്ചത്

കൊച്ചി: ലക്ഷദ്വീപിൽ റിപ്പോർട്ട് ചെയ്ത നാല് കടൽവെള്ളരി വേട്ട കേസുകളിൽ സിബിഐ അന്വേഷണം നടത്തും. വൈൽഡ്‍ലൈഫ് ക്രൈം കൺട്രോൾ ബ്യൂറോ ഓഫ് ഇന്ത്യ (ഡബ്ലിയുസിസിബി)യുടെ നിർദേശാനുസരണമാണ് സിബിഐയുടെ ഡൽഹി വിഭാഗം കേസിന്റെ അന്വേഷണച്ചുമതല ഏറ്റെടുത്തത്. ലക്ഷദ്വീപുമായി ബന്ധപ്പെട്ട കടൽ വന്യജീവി കുറ്റകൃത്യങ്ങൾ പ്രാഥമിക ഘട്ടത്തിൽ അന്വേഷിക്കുന്നത് ഡബ്ലിയുസിസിബിയാണ്.

ഈ വർഷം ജനുവരി-ഫെബ്രുവരി മാസങ്ങളിലാണ് ഏറ്റവും വലിയ വേട്ട നടന്നത്. ലോകത്തിലെ ഏറ്റവും വലിയ കടൽവെള്ളരി വേട്ടയ്ക്കായിരുന്നു ഫെബ്രുവരിയിൽ ലോകം സാക്ഷ്യംവഹിച്ചത്. ഫെബ്രുവരി 12ന് ലക്ഷദ്വീപിലെ ജനവാസമില്ലാത്ത സുഹേലി ദ്വീപില്‍നിന്ന് 852 കിലോ ഗ്രാം തൂക്കംവരുന്ന 1,716 കടല്‍വെള്ളരികളാണ് കവരത്തി വനംവകുപ്പ് പിടികൂടിയത്. അന്താരാഷ്ട്ര വിപണിയിൽ നാലു കോടി 26 ലക്ഷം രൂപയാണ് ഇതിന്റെ വില.

ലോകത്ത് ഇതുവരെ റിപ്പോര്‍ട്ട് ചെയ്യപ്പെട്ടതില്‍ ഏറ്റവും വലിയ കടല്‍വെള്ളരി വേട്ടയാണിതെന്ന് ഡബ്ലിയുസിസിബി വ്യക്തമാക്കിയിരുന്നു. മൽസ്യത്തൊഴിലാളികൾ നൽകിയ വിവരത്തിന്റെ അടിസ്ഥാനത്തിൽ സീ കുക്കുംബർ പ്രൊട്ടക്‌ഷൻ ടാസ്ക് ഫോഴ്സ് (SCPTF) നടത്തിയ പരിശോധനയിലായിരുന്നു ശ്രീലങ്ക, ചൈന എന്നിവിടങ്ങൾ ഉൾപ്പടെയുള്ള രാജ്യങ്ങളിലേക്ക് കയറ്റി അയക്കാൻ തയാറാക്കിയ കടൽവെള്ളരികൾ പിടികൂടിയത്. അന്വേഷണത്തിൽ കടൽവെള്ളരി വേട്ടയ്ക്ക് പിന്തുണ നൽകിയ പ്രാദേശികർ ഉൾപ്പടെ അഞ്ചുപേരെ പോലീസ് അറസ്റ്റ് ചെയ്തിരുന്നു. കേസിൽ ഉൾപ്പെട്ട യഥാർത്ഥ പ്രതികൾക്കായുള്ള അന്വേഷണം ഊർജിതമാക്കിയിരിക്കുകയാണ്.

ജനുവരിയിൽ രണ്ടു കോടിയോളം വിലവരുന്ന 219 കടൽവെള്ളരികളാണ് വനംവകുപ്പ് പിടികൂടിയത്. ഇതിൽ 173 ചത്തതും 46 എണ്ണം ജീവനുള്ളവയുമായിരുന്നു. സുഹേലി ദ്വീപിൽനിന്ന് പിടികൂടിയ അനധികൃതമായി വേട്ടയാടിയ കടൽവെള്ളരികളിൽ ജീവനുള്ളവയെ ഉദ്യോഗസ്ഥർ ബോട്ടിലെ ടാങ്കിലേക്ക് മാറ്റി രക്ഷപ്പെടുത്തിയിരുന്നു. സംഭവത്തിൽ 19ഉം 44 വയസുള്ള രണ്ട് പ്രതികളെ പോലീസ് കസ്റ്റഡിയിലെടുത്തിരുന്നു.

To advertise here, Whatsapp us.

കടൽവെള്ളരിയും സംരക്ഷണവും

വന്യജീവി സംരക്ഷണ നിയമത്തിന്റെ ഒന്നാം ഷെഡ്യൂളില്‍ ഉള്‍പ്പെട്ട കടല്‍ ജീവിയാണ് കടല്‍ വെള്ളരി (sea cucumber). ഇവയെ വേട്ടയാടുന്നതും പിടിക്കുടുന്നതും ഇന്ത്യയില്‍ പൂര്‍ണമായും നിരോധിച്ചിട്ടുണ്ട്. ഈ ജീവിയെ കച്ചവടം ചെയ്യുന്നതോ കച്ചവടാവശ്യങ്ങള്‍ക്ക് ഉപയോഗിക്കുന്നതോ അന്താരാഷ്ട്ര ഉടമ്പടിപ്രകാരം കുറ്റകരമാണ്.

കടൽവെള്ളരിയുടെ പ്രത്യേകത

വെള്ളരിയുടെ ആകൃതി ആയതിനാലാണ് ഇവയെ കടൽവെള്ളരി അഥവാ സീ കുക്കുംബർ എന്നുവിളിക്കുന്നത്. കറുപ്പ്‌, ചുവപ്പ് തുടങ്ങിയ നിറങ്ങളിലും മഞ്ഞവരകളോടു കൂടിയും ഇവയെ കാണാം. പരമാവധി രണ്ടു മീറ്റര്‍ വരെ ഇവ നീളംവയ്ക്കും. മൃദുവായ കുഴലുപോലെയുള്ളതാണ് ശരീരം. ആഴക്കടലിൽ പവിഴപ്പുറ്റിനൊപ്പം കാണപ്പെടുന്ന കടൽ വെള്ളരി പവിഴപ്പുറ്റ് എക്കോ സിസ്റ്റത്തിൽ ഒഴിച്ചുകൂടാനാകാത്ത ഘടകമാണ്. ആൻഡമാനിലും ലക്ഷദ്വീപ് സമൂഹങ്ങളിലുമാണ് ഇവയെ കൂടുതലായി കണ്ടുവരുന്നത്. മാലിന്യങ്ങൾ ഭക്ഷിച്ച് കടൽ വൃത്തിയാക്കി കടൽ വെള്ളത്തിന്റെ സുതാര്യത നിലനിർത്തുന്നതിൽ ഇവ മുഖ്യ പങ്കു വഹിക്കുന്നുണ്ടെന്ന് വിദഗ്ധർ പറയുന്നു.

ഭക്ഷണത്തിനും ഔഷധമരുന്നുകൾക്കുമായാണ് ഇവയെ ഉപയോഗിക്കുന്നത്. തെക്കുകിഴക്ക് ഏഷ്യ, ചൈന എന്നിവിടങ്ങളില്‍ സൂപ്പുണ്ടാക്കാന്‍ ഇവ വ്യാപകമായി ഉപയോഗിച്ചുവരുന്നു. ഒരു കിലോഗ്രാം ഉണങ്ങാത്ത കടൽവെള്ളരിക്ക് രാജ്യാന്തര വിപണിയിൽ 50,000 രൂപയിലധികം വിലയുണ്ടെന്നാണ് റിപ്പോർട്ട്.

കടപ്പാട്: samayam.com, manoramanews.com


ദ്വീപ് മലയാളി ടെലഗ്രാംവാട്‌സാപ്പ് എന്നിവയിലൂടേയും ഫോളോ ചെയ്യാം... വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക

ഏറ്റവും പുതിയ വാർത്തകൾ അറിയാൻ ദ്വീപ് മലയാളി ആപ്പ്‌ ഡൗൺലോഡ് ചെയ്യുക

LEAVE A REPLY

Please enter your comment!
Please enter your name here