സ്കൂളുകൾ ജൂൺ പതിമൂന്നിന് തുറക്കും. മുഴുവൻ സമയ പഠനം തിരിച്ചു വരുന്നു.

കവരത്തി: ലക്ഷദ്വീപിലെ എല്ലാ സ്കൂളുകളിലും വേനലവധി കഴിഞ്ഞ് ജൂൺ പതിമൂന്നിന് ക്ലാസുകൾ പുനരാരംഭിക്കും. എല്ലാ ക്ലാസിലും അടുത്ത അധ്യയന വർഷം മുതൽ മുഴുവൻ സമയവും ക്ലാസ് ഉണ്ടായിരിക്കും. കഴിഞ്ഞ വർഷങ്ങളിൽ കോവിഡ് മുൻകരുതലുകളുടെ ഭാഗമായി ഓൺലൈൻ ക്ലാസ്സുകളും പകുതി സമയ ക്ലാസുകളുമാണ് ഉണ്ടായിരുന്നെങ്കിൽ ഇനി മുതൽ പഴയ പോലെ മുഴുവൻ സമയ ക്ലാസുകളാവും ഉണ്ടാവുക. എല്ലാ ദ്വീപിലെയും പ്രിൻസിപ്പൽമാരും ബിത്ര ദ്വീപിലെ പ്രധാനാധ്യാപകനും അതാത് ദ്വീപുകളിലെ സ്കൂളുകളിൽ ആവശ്യമായ ക്രമീകരണങ്ങൾ മുൻകൂട്ടി പൂർത്തിയാക്കാൻ ലക്ഷദ്വീപ് വിദ്യാഭ്യാസ വകുപ്പ് ഡയറക്ടർ ശ്രീ. രാകേഷ് സിൻഹാൾ ഇറക്കിയ ഉത്തരവിൽ പറയുന്നു.